Maqedonia e Veriut

Vlerësimi i parë i dendësisë së popullatës së rrëqebullit të Ballkanit në rajonin e Mavrovës (zona me përqëndrimin më të madh të popullatës në Ballkan)

Një studim i ri, i publikuar në kuadër të Programit për Rimëkëmbjen e Rrëqebullit të Ballkanit (BLRP), jep informacion të rëndësishëm mbi gjendjen aktuale të këtij lloji kritikisht të rrezikuar në zonën e tij bërthamë. Qëllimi i studimit ishte të jepte përgjigje pyetjes shkencore: Sa individë rrëqebuj të Ballkanit kanë mbetur në habitatin e tyre kryesor dhe si ka ndryshuar kjo shifër gjatë dhjetë viteve të fundit?

Gjatë periudhës 2013–2023, rrëqebulli i Ballkanit është monitoruar në pyjet dhe malet e thepisura të Parkut Kombëtar të Mavrovës përmes kamerave kurth. Janë regjistruar rreth 180 detektime dhe për analizimin e të dhënave është përdorur metoda e identifikimit të individëve nëpërmjet krahasimit të fotografive të realizuara nga kamerat kurth gjatë kësaj periudhe.

Rezultatet tregojnë një rënie të ndjeshme: nga viti 2013 deri në 2023, dendësia e vlerësuar e rrëqebullit në zonën bërthamë është përgjysmuar. Edhe pse këto dendësi janë të krahasueshme me ato të popullatave të tjera të rrëqebullit në Evropë, rënia e vazhdueshme në një grup kaq të vogël dhe të izoluar është shqetësuese.

Pavarësisht sfidave, si numri i ulët i detektimeve dhe mungesa e të dhënave mbi gjininë, përdorimi i modeleve hapësinore të kapjes dhe rikapjes mundësoi vlerësime të qëndrueshme të dendësisë në pesë sesione monitorimi. Këto gjetje nënvizojnë nevojën urgjente për masa të menjëhershme për mbrojtjen e rrëqebullit, përfshirë përforcimin e popullatës dhe monitorimin gjenetik.

Te studimi (në anglisht)

Prapa