Северна Македонија

Ново истражување: Први робусни проценки за густината на популацијата на балканскиот рис во неговото јадро

Ново истражување објавено во рамки на Програмата за закрепнување на балканскиот рис (BLRP) дава увид во моменталната состојба на критично загрозениот балкански рис во неговото јадро. Истражувањето се обидува да одговори на едно суштинско прашање: Колку балкански рисови останале во нивното основно живеалиште и како се променил овој број во последната деценија?

Во период од десет години (2013–2023), го следевме балканскиот рис во шумите и тешко пристапните планински предели на Националниот парк Маврово со поставување на фото-замки. Забележавме речиси 180 детекции и користевме просторни модели на фаќање и префаќање (spatial capture-recapture) за да ја процениме густината на рисовите и да ги анализираме популациските трендови низ времето.

Резултатите покажуваат забележителен пад: од 2013 до 2023 година, проценетата густина на балканскиот рис во јадрото на неговото живеалиште се преполовила. Иако овие густини сè уште се споредливи со други европски популации на рис, континуираниот надолен тренд кај толку мала и изолирана популација е причина за сериозна загриженост.

И покрај предизвиците како ниските стапки на детекција и недостигот на податоци за полот на животните, употребата на просторни модели на фаќање и префаќање овозможи да се добијат сигурни проценки за густината низ пет истражувачки сесии. Нашите наоди ја истакнуваат итноста за акција насочена кон зачувување на оваа популација, воедно и нејзино зајакнување и генетски мониторинг.

До студијата (на англиски)